Bertsularitzari buruzko liburu berri bat

2005-12-22 | Partekatu: facebook | twitter

Eguberriko opari guziak oraindik erosi ez dituztenek jendea irri eginarazten duten eta euskal nortasunaren ikurrak diren bertsulariak omentzen dituen liburu hau eros dezakete.

Denis Laborde etnologoa Baionan sortu zen 1959an. Ikerketa Zientifikoaren Zentro Nazionaleko ikertzaile honek jadanik lan ezberdinak eginak ditu euskal gaietan. Hala nola, 2002an, Euskal kultur erakundearen Kantuketan programaren karietara argitaratu izen bereko liburuan parte hartu zuen.

Liburu berri honetan, bertsularitzari buruzko azalpenak ematen ditu eta aipamen historikoak egiten, arte honen bilakaera eta gaur egungo egoera hobeki ulertzeko.

Euskal nortasunaren sinboloa bilakatu den arte herrikoia

Munduan zehar bertsularitza mota frango baldin badira ere, Euskal Herrian anitz garatu da, ostatuetan, sagarnotegietan eta bizikidetasun toki guzietan sartuz. Denis Labordek azaltzen du euskal nortasunaren sinboloetatik bat bilakatu dela. Alabaina, gaur egun ikastetxeetan erakusten da eta txapelketek oihartzun zabala daukate, aurtengo Euskal Herriko Txapelketaren finalean Barakaldon bildu 13 000 pertsonek frogatu bezala.

Bertsularitzaren oinarrizko printzipioak eman ondoren, hirugarren kapituluan, Denis Labordek memorioaren mekanismoa aztertzen du eta azalpenak ematen ditu bertsulariak bertsuak nola egiten dituen ulertzeko.

Garai berri baten hasiera

Seigarren eta azken kapituluan, 1989ko abenduaren 19an Donostian iragan Txapelketa Nagusiaren finala aipatzen du. Idazlearen ustez, egun hura aro berri baten hasiera izan zen, gazte anitz eta emazte trebeak aritu baitziren bertsutan, bertsularitzarentzat egun oparoak aurreikusiz.

Xehetasunak :

• Denis Laborde
• www.bertsulari.com
• www.bertsozale.com
• Euskal Herriko Bertsolari Txapelketaren webgune ofiziala