Iparraldeko idazleak eta artistak Durangon

2009-12-03 | Partekatu: facebook | twitter

Euskal kulturaren ezinbesteko hitzordua

Abenduaren 4tik 8ra Durangoko Disko eta Liburu Azokaren 44. edizioa ospatuko da eta aurtengo gomita Katalunia izanen da. Ezbairik gabe, Durangoko Azoka euskal kulturaren hitzordu garrantzitsuenetarik bat da, 4000 metro karratuko eremuarekin, 30.000 disko eta liburu erreferentziekin (gehien-gehienak euskaraz), kontzertuak eta erakusketak, hori dena besta giro batean.

Gerediaga elkartearen eta Euskal kultur erakundearen arteko partaidetza

Euskal kultur erakundeak plaketa bat argitaratu du Azokan izanen diren Iparraldeko argitaratzaileen aurkezteko.

Orain duela hiru urte abiatu Gerediaga elkarte antolatzailearen eta Euskal kultur erakundearen arteko partaidetzari esker, ipar Euskal Herriko argitaratzaileen ekoizpenak argiago agertzen dira Azokan.

Elkarlan horren karietara, besteak beste Gerediaga-k eremu berezia antolatua die, toki berean izan daitezen.

Bestalde, Euskal kultur erakundeak gertakari honen inguruko komunikazio lan handia eginen du Azokan izanen diren ipar Euskal Herriko eragileen eta ekoizpenen aurkezpen plaketaren 4000 ale baino gehiago banatuz. Bestalde, publizitate kanpaina bat egina izanen da Euskal Herriko prentsa idatzian.

Iparraldeko sei argitaratzaile ordezkatuak

Amaia Riouspeyrousen lehen diskoa Durangon aurkeztua

Agorila
Pil Pil, Oldarra, Amaia Riouspeyrous, Haurrock, Beñat Achiary eta Peio ta Pantxoaren disko berrien aurkezpena...

ZTK elkartea
"Alpbarock Euskal Herrian" diskoaren aurkezpena : musika baroko suitzarraren eta Euskal Herriko musikaren arteko topaketa, ohiko euskal musika tresnekin.

Maiatz elkartea
Eñaut Etxamendi, Mailux Legorburu, Marikita Tambourin, Mixel Thikoipe, Pablo Sastre, Peio Jorajuria eta Xabaltxen lan berrien aurkezpena.

Amaia Hennebutte-Millardek bere haur liburu trilogia aurkeztuko du Durangon.

Ikas pedagogia zentroa
Amaia Hennebutte-Millard-en "Hiru otso" triologiaren aurkezpena otsoaren gaiaren inguruan : hiru liburu (ipuin tradizionalen egokipena, eta sorkuntza), CD batez lagundua.

Gatuzain argitaletxea
Sandrine Mounier-en "Erraldoi Xuria" eta Marie-Hélène Martens-en "Abereen oihuak eta zurrumurruak" liburuen aurkezpena.

Euskaltzaleen Biltzarra
Jean Etxepareren "Iturraldea" eta "Iraupenean etorkizuna" (Euskaltzaleen Biltzarra) liburuen aurkezpena.

Durangoko Azokan izanen diren Iparraldeko argitaratzailei buruzko xehetasun gehiagorentzat ikus aurkezpen plaketa (PDF - 1,5 Mo).

Aurkezpenak eta kontzertuak

Bestalde, liburu batzuen aurkezpen publikoak egin ohi dira Azoka denboran eta iparraldeko idazlea eta artistak ere ez dira faltako.

Peio Jorajuriak "Uzkinazo luma" aurkeztuko du

Bertan izanen direnak : Maialen Garat eta Xan Aire ( "Seaska : 40 urte euskararen alde" - Elkar), Amaia Hennebutte-Maillard ("Hiru otso" - Ikas zerbitzu pedagogikoa), Mixel Thikoipe ("Jin Bezala" - Maiatz), Mailuix Legorburu ("Ahizpa zoin zira" - Maiatz), Peio Jorajuria ("Uzkinazo luma" - Maiatz), Xabaltx ("Xabaltx" - Maiatz), Pablo Sastre ("Albaren irudiak" - Maiatz), Euskaltzaleen Biltzarra ("Iraupenean etorkizuna" - Euskaltzaleen Biltzarra - Egan), Sandrine Mounier ("Erraldoi xuria" - Gatuzain), Marie-Hélène Martens ("Abereen oihuak eta zurrumurruak" - Gatuzain), Marikita Tambourin ("Iraun" - Maiatz) eta Eñaut Etxamendi ("Idazlanak 1 eta 2" - Maiatz).

Pil Pil taldea

Bestalde, Durangoko Plateruena Kafe Antzokiaren eta Euskal kultur erakundearen arteko partaidetzari esker, kontzertuak antolatuak dira abenduaren 8an honako artistekin : Jean-Mixel Bedaxagar ("Auñamendi" disko berriaren aurkezpena), Pil Pil taldea (Bordagarai familiaren diskoaren aurkezpena), Amaia Riouspeyrous ("Har ezazu" estreineko diskoa) eta Xabaltx ("Cymeus" disko berria).

Aurkezpenen eta kontzertuen egunak eta ordutegiak ezagutzeko, ikus aurkezpen plaketa (PDF - 1,5 Mo).

Xehetasunak

• Durangoko Liburu eta Disko Azoka
• Euskal kultur erakundea - Frank Suarez
• Ipar Euskal Herriko Ekoizpenak Durangon plaketa
  (PDF - 1,5 Mo)
• Durango 2009: aurkezpena eta hitzordu nagusiak
  (PDF - 1,5 Mo)