Euskal kultur erakundeak antolatzen dituen ekitaldien edo eramaten dituen lanen berri plazaratzen ditu atal honek. Media ezberdinak lehenetsiz beti (bideoak, soinuak...).
Euskal kultur erakundearen bizi aberatsaren miraila izan da nahi du blog honek. Zure oharrek gure edukiak aberats ditzatela! Mezuen izenburuetan klik egin eta igor zure komentarioa!
Baiona-Hego Akitaniako Eszenatoki Nazionalak eta Euskal Kultur Erakundeak berriki sortu "Kultura" emaitza fondoari esker, lehen ekimen bat abian da: "Hogei'ta" egitasmo artistikoetarako deialdia.
2011n arte bisualen alorrean "Hogei’ta" labelaren kari eraman ekimen arrakastatsuari segida bat emanez, Euskal kultur erakundeak egitasmo artistikoetarako deialdi bat abian ezartzen du datorren urteko, antzerkiaren, dantzaren eta zirkoaren alorretan. Baiona Akitania Hegoaldeko Eszena nazionalarekin elkartuz karia hortara. Hautagaitzen epea 2012ko martxoaren 20rako finkatua da. Egitasmoen hautaketak aldiz 2012ko apirilean iragan behar luke
Euskal kultur erakundeak multimedia erakusketa ibiltari berri bat estreinatu du 2011ko irailaren 15ean Donibane Lohizune / Ziburu lurraldean bildu marinelgoaren inguruko lekukotasun hunkigarrietan oinarrituz.
Hiru hizkuntzatan (euskaraz, frantsesez eta gazteleraz) itsas mundua barne-barnetik sendiarazteko xedea dauka, erakusketan entzun eta ikusgai diren lekukotasunen bitartez : hirurogeita hamabi filma-zati, sei orduko grabaketa, denek aipatzen dituztelarik portuaren eta arrantzaren inguruko istorioak. Hauen artean, arrantzaleak berak, bainan ere haien emazteak, arrain-saltzaileak, edo berdin itsasontzietan zoazen erizainak.
Arteen Historia, Garapen Iraunkorra, Euskal Herria irakatsi... Berriki, irakasgai eta dispositibo berri batzu sartu dira ikastetxeetako egitarauetan. Euskal kultura ere saiatzen da ipar Euskal Herriko ikastetxe eta kolegioetan sartzen.
Estelle Carricondo, Geografia-Lurralde Antolaketa ikasleak bere proposamenak egiten dizkigu, Euskal kultur erakundean egin lau hilabeteko ikastaldiaren ondotik.
Baiona-Hego Akitaniako Eszenatoki Nazional eta Euskal Kultur Erakundearentzako emaitza fondo bakarraren sortzeari esker emaileek (enpresa pribatu, pertsona) gradu berean –
eta aldi berean – laguntzen ahalko dituzte euskal kultura eta beste kultur adierazpenak.
Kultura emaitza fondoaren sorrerako biltzar nagusia (Baiona - 2011-06-22)
Emaitza fondoa, nasaitasun mota guziak (dohaintza, legatu, eskuz egindako emate, bizi aseguru,
eskuzabaltasun publikorako dei,...) eskuratzeko gai den fundazio baten gisan ariko da. Abantaila fiskalak eta ordainsariak izanen dira emaile guzientzat.
Hala Kultura emaitza fondoak Baiona-Hego Akitaniako Eszenatoki Nazionalak eta Euskal Kultur Erakundeak eramanen dituzten ekintzen garapenean parte hartzen ahalko du. Ber denboran, bi kultur instituzioei interesatuko zaizkien proiektu berrien azaleratzea sustatuko du.
Claire Rousier andereak euskal dantzari buruz eraman duen ikerketa tokiko eragileei zuzendu bilkura publiko batean aurkeztua izan da 2011ko maiatzaren 5ean, Uztaritzen, EKE-ren ekimenez.
Egilea: Nahia Garat
Oroitarazi behar da erakunde partaide ezberdinek EKEri obralarigintzan emandako misio berriak abian emateko, euskal dantzari buruzko ikerketa lan bat egitea eskatua izan zaiola eta ikerketa horrek erabaki hortan duela iturburua.
Ikerketa hori Claire Rousier andereak eraman du (Pariseko « Centre National de la
Danse » zentroaren Memorio eta Ikerketa Zerbitzuaren zuzendaria), eta elgarrizketentzat
EKEko Maia Etchandy-ren laguntza ukan du. Orotara, dantza munduko berrogei bat
pertsona elgarrizketatuak izan dira. Ikerketa hori, Iparraldeko Dantzarien Biltzarraren
laguntzarekin eramana izan da, bere aldetik, dantza talde gehienetan (baita herriko etxe
eta herri elkargoetan) inkesta bat eraman duelako. Ikerlan hori, Patrick Larralde-k du IDBrentzat eraman eta bildutako estatistikek Rousier anderearen ikerketa aberastu dute.
Ikerlan horren ondorioz, zonbait proposamen atera dira besteak beste, ondarearen
bilketan, transmizioan, formakuntza arloan baita ere dantzarako gela egokien beharra
agerian utziz. Amaturren lanaren sustengua beharrezkoa dela ere argiki errana izan da.
2011.urtea, bigarren fase batera pasatzeko garaia izanen da: ekintza konkretuak abiatuz.
Hazparnen, 2011ko apirilaren 9an iragan den Euskal kultur erakundeko biltzar nagusia kari, Pantxoa Etchegoin zuzendariak aurkeztu 2010eko ekintzen bilduma onartu izan da. Eskuragarri da sarean.
Euskarazko aurkezpena ilustratzen zuen frantsesezko euskarria ikusgai da ere ondotik.
Euskal kultur erakundeak bere urte anitzetako kultur egitarau berria aurkeztu du Baionan. "Hogei'ta" ekintza labelak gazteak bilakarazi nahi ditu euskal kulturaren aktore eta berritzaile.
Izenpetze-ekitaldian parte hartu dutenak: Josune Ariztondo, Azkue Fundazioa patronatuaren burua eta Kulturako diputatua, Miren Dobaran, Bizkaiko foru Aldundiaren Euskara Sustatzeko zuzendari nagusia, Azkue Fundazioko zuzendari kudeatzailea den Rodrigo Gartziarekin, Jean Philippe Larramendy, France-Euskadi Institutuaren lehendakaria, eta Euskal Kultur Erakundeko zuzendaria den Pantxoa Etchegoin.
Azkue fundazioak Euskal Kultur Erakundearekin (EKE) batera jorratuko dituen egitasmoak bideratzeko sortu berri duen Elkarlanerako Komunitatea aurkeztu du karia horretara. Horri esker, Azkue fundazioaren Euskararen Interpretazio Zentroaren edukiak eskuragarri egongo dira bai frantsesez bai euskaraz sortu den komunitate horretan adibidez.
Bestalde bi erakundeak elkarlanean arituko dira ekintza batzu antolatzeko orduan. Gazteei zuzendutako "Irudimena" izeneko testu eta irudi lehiaketa bide horretatik doa. 2011ko otsailaren 15etik apirilaren 8ra iraganen da EKE-k eta Azkue Fundazioak kudeaturik.
Euskal kultur erakundeak albistegi elektroniko bat banatzen du astero emailez, asteko albistea eta agendako ondoko gertakarien aipamena zabalduz. Iritzi-inkesta bat eramana izan da zerbitzu hori baliatzen dutenei zuzenduz.
Bost urteren buruan iduritu zaigu garrantzitsua zerbitzu horren inguruko kontsulta baten egitea eta ondorioz iritzi-galdeketa bat igorria izan zaie harpidedunei 2010eko irail hastapenean.
Galdeketa horren helburu nagusia harpidedunen iritzia biltzea izan da bai newsletter-aren igorketa-maiztasunari begira baita ere horren mamiari buruz eta orokorki www.eke.org atariari buruz iritzi batzuen biltzea.
Iritzi-galdeketaren betetzeko proposamena bidalia izan da frantsesezko newsletterari harpidetuak ziren 1027 jendei eta euskarazko boletinari harpidetuak ziren 1244 lagunei (2271 harpidedun orotara). Mezuak eta galderak berdinak ziren frantsesezko eta euskarazko inkestan.
Galderak honako hauek ziren :
Euskal kulturaren Iparralderako agenda banatzen duen EKE-Berriak boletina elektronikoa gustukoa duzu?
Iduritzen bazaizu hobetzen ahal genukela zerbitzu hau, nola egin genezake?
Zein maiztasunarekin eskuratu nahi zenuke boletina?
Zer diozu www.eke.org atariaz?
Euskarazko boletina eskuratzen duten 70 pertsonek erantzun dute (euskal harpidedunen %7) eta frantsesezkoa eskuratzen duten 95 jendek (frantses harpidedunen %10,5).
Ondoko grafikoek euskal harpidedunen emaitzak laburbiltzen dituzte. Frantses harpidedunenak oso antzekoak dira.
Galderei erantzuteaz gain anitzek emaitzak atzertzeko baliagarriak izan diren oharrak utzi dituzte ere.
Orohar jendeak preziatzen du Euskal kultur erakundeak egiten duen sintesia lana (oraino hobetzekoa bada ere : gertakari gehiago sartzea, goizago sartzea...) eta www.eke.org atariaz duen iritzia ona da.
Harpidedunen erantzunei interesatzen bagira, argi da irakurle gehienek eskatzen diotela boletinari euskal kulturari mugatzea agendako gertakariak hautatzeko orduan.
Haatik gehiengo batek gustukoa luke ere Hegoaldeko euskal kulturaren inguruko gertakari nagusien berri izatea. Gehiengo zabal batek preziatzen du ere gaurko igorketa maiztasuna, hau da albistegia emailez astean behin eskuratzea.
Boletinaren aberastea (diseinua, edukiak...) edo bere horretan uztea eztabaidatzekoa da. Izan ere nabari da irakurlek gehien preziatzen dutena boletinaren irakurgarritasuna eta xinpletasuna dela.
Euskal kultur erakundeak emaitza eta ohar guzi horiek bereganatuko ditu www.eke.org euskal kulturaren atariak eskaintzen duen zerbitzuaren hobetzeko ondoko hilabeteetan.
Euskal kultur erakundeak bere "Batekmila - Euskal munduak" erakusketa ibiltariaren edukiak sarean ezarri ditu www.euskalmunduak.com atari berrian. Bost hizkuntzatan gainera (euskara, frantsesa, gaztelera, inglesa eta kataluniera).
Atari honek «Batekmila» web-erakusketara eta guremunduak.com aplikazio berezira joateko bideak agerian emateaz gain, euskal kulturaren munduan gaindiko albiste hautatu batzu plazaratzen ditu. Bertan Euskal Herritik kanpoko Iparraldeko artisten birak edo erakusketak aipatzen dira bereziki.
Blog honen frantsesezko bertsio bat bada ere. Gehienetan gaiak bi hizkuntzatan jorratzen ditugu bainan gerta daiteke batzutan gai bat hizkuntza bakar batean tratatua izatea. Biltegia bloga ikus frantsesez.
