Lastozko itsasoa

Belem-en hauteman ditut
Desioaren untzi ixilak
Lastozko itsasoan aldiz
Itzal buluzien dantza lehunak

Lisboan ito naiz
Amodioaren ur geldietan
Alfaman galdu naiz
Eskas dutanaren egarrian

Belemetik abiatu ziren
Indietara

Batzu joaiten dira eta
Bertzeak gelditzen
Batzu bizi dira eta
Bertzeak biziaz mintzo
Batzuk bizia emaiten dute eta
Bertzek kantu bat
Batzuen gorputzetik dario plazerra eta
Bertzen arimatik ixurtzen da fadoa

Belemen, uhainak ahapetik dio :
Ixo
Amodioaz hitzegitea
Haizea orraztatzea da
Ixo
Amodioaz hitzegitea
Itsuarentzat dantzatzea da
Ixo
Amodioaz hitzegitea
Asunen pherekatzea da
Silêncio, cantam gitarras

X. Itzaina
Lisboa, 2004eko maiatzean